ന്യൂഡൽഹി∙ ഇന്ത്യയുടെ നാനാത്വത്തിലെ ഏകത്വത്തിനു നുഴഞ്ഞുകയറ്റക്കാർ ഭീഷണിയാകുന്നതായി പ്രധാനമന്ത്രി നരേന്ദ്ര മോദി. ഇത്തരം നുഴഞ്ഞുകയറ്റക്കാർ ജനസംഖ്യാപരമായ മാറ്റത്തിനു കാരണമാകുകയാണ്. സാമൂഹിക ഐക്യത്തിനും ആഭ്യന്തര സുരക്ഷയ്ക്കും അപകടമുണ്ടാക്കുകയാണ്. നാനാത്വത്തിൽ ഏകത്വം എന്ന ശക്തി എന്നു തകരുന്നുവോ അന്ന് ഇന്ത്യ ദുർബലമാകും. അതുകൊണ്ടാണു താൻ ജനസംഖ്യാ ദൗത്യം പ്രഖ്യാപിച്ചതെന്നും മോദി പറഞ്ഞു. ആർഎസ്എസ് ശതാബ്ദി ആഘോഷ ചടങ്ങിൽ സംസാരിക്കുകയായിരുന്നു അദ്ദേഹം.
100 വർഷങ്ങൾക്കു മുമ്പ് വിജയദശമി ദിനത്തിലാണ് ആർഎസ്എസ് സ്ഥാപിതമായതെന്നു പ്രധാനമന്ത്രി ഓർമിപ്പിച്ചു. ‘‘തിന്മയ്ക്കെതിരെ നന്മയുടെയും, അസത്യത്തിനുമേൽ സത്യത്തിന്റെയും, ഇരുട്ടിനുമേൽ വെളിച്ചത്തിന്റെയും വിജയത്തിന്റെ പ്രതീകമായാണ് ഈ ഉത്സവം ആഘോഷിക്കപ്പെടുന്നത്. സംഘടനയെ അപകീർത്തിപ്പെടുത്താൻ ശ്രമിച്ചിട്ടും ആർഎസ്എസ് അതിന്റെ ലക്ഷ്യത്തിൽ തന്നെ തുടർന്നു. അവർ രാഷ്ട്രത്തിന് പ്രഥമ സ്ഥാനം നൽകി. ആർഎസ്എസ് മുഖ്യധാരയിലേക്കു വരുന്നത് തടയാൻ എണ്ണമറ്റ ഗൂഢാലോചനകൾ നടന്നു. ഗുരുജിയെ വ്യാജ കേസുകളിൽ കുടുക്കി ജയിലിലടച്ചു.’’ –മോദി പറഞ്ഞു.
‘‘ഇന്നത്തെ ഇന്ത്യ നേരിടുന്ന വെല്ലുവിളികളും നടത്തുന്ന പോരാട്ടങ്ങളും വ്യത്യസ്തമാണ്. നമ്മുടെ ഐക്യം തകർക്കാനുള്ള ഗൂഢാലോചനകൾ നടക്കുന്നു. ഒരു പ്രധാനമന്ത്രി എന്ന നിലയിൽ, നമ്മുടെ സർക്കാർ ഈ പ്രശ്നങ്ങളെല്ലാം ഫലപ്രദമായി കൈകാര്യം ചെയ്യുന്നുണ്ട്. ഞാൻ അതിൽ സംതൃപ്തനാണ്. അതേസമയം ഒരു സ്വയംസേവകൻ എന്ന നിലയിൽ, ആർഎസ്എസ് ഈ വെല്ലുവിളികളെ തിരിച്ചറിഞ്ഞ് അവയെ ചെറുക്കുന്നതിനുള്ള ഒരു പദ്ധതി രൂപകൽപ്പന ചെയ്തതിൽ ഞാൻ വളരെ സന്തുഷ്ടനാണ്’’ –മോദി പറഞ്ഞു. English Summary:
Modi Warns of Threats to Indian Unity: Narendra Modi says Indian Unity Threatened by infiltrators causing demographic change, impacting social harmony and internal security. Prime Minister addressed the issue during the RSS centenary celebrations, highlighting threats to India\“s strength and the need for population control. |
