അപൂർവ ഇനത്തിൽപെട്ട പമ്പരക്കാട പാലക്കാട് ജില്ലയിൽ; ആറായിരം കിലോമീറ്റർ നിർത്താതെ പറക്കാൻ കഴിവ്

  



പാലക്കാട് ∙ അപൂർവ ഇനത്തിൽപെട്ട ‘പമ്പരക്കാട’ പക്ഷിയെ （റെഡ് നെക്ഡ് ഫലറോപ്） ജില്ലയിൽ ആദ്യമായി കണ്ടെത്തി. പക്ഷി നിരീക്ഷകനായ നോവൽ കുമാറാണ് മരുതറോഡ് പഞ്ചായത്തിലെ പടലിക്കാട് പാടശേഖരത്തിൽ നിന്നു പമ്പരക്കാടയെ കണ്ടെത്തിയത്. പാലക്കാട് നാച്വറൽ ഹിസ്റ്ററി സൊസൈറ്റി അംഗങ്ങൾ ആയ രവി കാവുങ്ങൽ, വിവേക് സുധാകരൻ എന്നിവരും പക്ഷി നിരീക്ഷകസംഘത്തിൽ ഉണ്ടായിരുന്നു. പക്ഷികളെക്കുറിച്ച് ശാസ്ത്രീയ വിവരങ്ങൾ ശേഖരിക്കുന്ന ഇ–ബേഡ് പ്ലാറ്റ്ഫോമിലെ കണക്കനുസരിച്ച് ജില്ലയിൽ കണ്ടെത്തുന്ന 422–ാം പക്ഷി ഇനമാണ് പമ്പരക്കാട.

കടൽത്തീരത്തു നിന്നു മാറി ഉൾനാടുകളിൽ അപൂർവമായി മാത്രമേ ഇവയെ കാണാറുള്ളൂ. 2023ൽ കോയമ്പത്തൂർ ഭാഗത്തും ഇവയെ കണ്ടെത്തിയിരുന്നു. പ്രത്യേക കാലാവസ്ഥയും മഴയുമാവാം ഇവിടേക്കെത്താൻ കാരണമായതെന്നും പക്ഷി നിരീക്ഷകസംഘം പറഞ്ഞു. പാലക്കാട്ടെ ഉൾനാടൻ പാടശേഖരങ്ങളുടെ ജൈവവൈവിധ്യ പ്രാധാന്യം വിളിച്ചോതുന്നതാണ് ഈ കണ്ടെത്തൽ. ആറായിരം കിലോമീറ്റർ നിർത്താതെ പറക്കാൻ കഴിവുള്ളവയാണു പമ്പരക്കാട പക്ഷികൾ. വെള്ളത്തിൽ ദിവസങ്ങളോളം വിശ്രമിക്കാനും ഇവയ്ക്കു കഴിയും. വെള്ളത്തിൽ പമ്പരം പോലെ ദീർഘമായി കറങ്ങി ചെറുമത്സ്യങ്ങളെയും സൂക്ഷ്മ ജീവികളെയും ജലോപരിതലത്തിൽ വച്ചാണ് ഇവ ഭക്ഷണമാക്കുന്നത്.

പമ്പരം പോലെ കറങ്ങുന്നതിനാലാണ് ഇവയ്ക്കു പമ്പരക്കാട എന്നു പേരു വന്നത്. വടക്കേ അമേരിക്കയിലും ആർട്ടിക്, യൂറേഷ്യൻ മേഖലയിലും ഇവ പ്രജനനം നടത്തുന്നു. ശൈത്യകാലത്ത് ഉഷ്ണമേഖലാ സമുദ്രങ്ങളിലാണ് ഇവ കഴിയുന്നത്. ഈ യാത്രയിലാണ് അപൂർവമായി കേരളത്തിന്റെ തീരത്തെത്തുന്നത്. യുറേഷ്യയിൽ നിന്ന് അറേബ്യൻ സമുദ്രത്തിലേക്കു പറന്നാണ് ഇവയുടെ ദേശാടനം. ശരാശരി 18 സെന്റിമീറ്ററോളം നീളം വരുന്ന ഇവയുടെ പെൺപക്ഷികൾക്കാണ് ആൺപക്ഷികളെക്കാൾ സൗന്ദര്യമെന്നതും പമ്പരക്കാടകളുടെ പ്രത്യേകതയാണ്. English Summary:
Red-necked Phalarope spotted in Palakkad district is a rare discovery. This sighting highlights the biodiversity of Palakkad\“s inland paddy fields, emphasizing the importance of preserving these unique ecosystems.